شن أحمد شوبير، حارس النادي الأهلي ومنتخب مصر السابق، هجومًا غير مسبوق على إدارة القلعة الحمراء، بعد التعادل الإيجابي أمام فريق القناة في مسابقة الدوري المصري الممتاز، لموسم 2026-2027.
ونَجَا الأهلي بقيادة الحسين عموتة من الغرق أمام القناة، بتعادل مثيرة بنتيجة 3-3، في اللقاء الذي أقيم على ستاد القاهرة الدولي، ضمن منافسات الجولة السابعة من بطولة الدوري الممتاز.
وفتح أحمد شوبير النار على إدارة الأهلي بعد التعادل أمام القناة وذلك عبر تصريحات إذاعية اليوم الخميس قائلًا:«محدش يقول لي إن الأهلي مرهق عشان راجع من أوغندا، محدش يقول الكلام ده خالص، الأهلي رايح في طيارة خاصة وراح المباراة ولعب ورجع ومكنش فيه مشاكل خالص».
وأضاف: «طيب أنا همشي معاك في اللي أنت بتقوله كده، هو مش بيراميدز كده برضه راح جنوب السودان، والزمالك مش راح أوغندا وطيران عادي مش خاص، ده بيراميدز رجع يدوب اتمرن تمرينة كسب طلائع الجيش 4 وقبلها سيراميكا 4، وهو أقوى دفاع وهجوم وداخل مرماه 3 أهداف، الأهلي داخل مرماه 6 أهداف، فريق مكتمل محوط على نفسه».
وتابع: «وقول لي إيه الإضافات اللي على بيراميدز الموسم ده؟ المهاجم الجزائري نذير أبو علي ومش بيلعب أساسي، لكن لما بيلعب بيجيب أجوان، وخالد عوض من طلائع الجيش، عشان بس محدش يقول لك معاهم فلوس وبيدفعوا وبيعملوا، يا جماعة ده أوباما اكتشاف السنة دي، الراجل موكوينا موظفه في مكان جديد والولد بيجيب أهداف وبيصنع أهداف».
وواصل حارس الأهلي السابق: «لازم إدارة الأهلي تقف مع نفسها وتشوف الأخطاء اللي جوه الأهلي، ليه اللعيبة وصلت للحالة دي؟ لا فيه روح ولا مبالاة، والجماهير هتموت ومستحملة، صحيح الجماهير إمبارح مكانتش كثير، بس لو فيه فرد واحد في المدرج لازم تحترمه».
واستكمل: «أنت عندك لخبطة، فيه سيستم عايز يتظبط، أنتوا مش حاسين إن الموسم اللي قبل اللي فات الفرقة خدت الدوري بما يشبه المعجزة، وبعدها مشي كولر وغيرت كذا مدرب، ودلوقتي الحسين عموتة والضغط قوي عليه وبتقولوا مشيه، ومشيت كام مدير كرة حضرتك؟ محمد رمضان على خالد بيبو على وليد صلاح الدين على محمد يوسف، يعني غيرت مدربين ومديرين كرة وأجهزة فنية، وإيه النتيجة؟ أنت المستوى في النازل».
وضرب شوبير المثل بنادي الزمالك، قائلًا: «الزمالك دول يتعمل لهم تمثال، ده مفيش فرقة، بيزيرا مشي وحسام عبد المجيد مشي، وقبلهم ناصر ماهر ونبيل عماد دونجا، وكلهم كانوا بيلعبوا أساسيين، وسيف الدين الجزيري عقده خلص ومشي، وإصابات موجودة بالجملة في الفريق، لكنه كسب بترول أسيوط وقبلها كسب الجيش في رواندا».
